Wanafunzi watoro wasakwa.
Serikali wilayani Muleba imeanza operesheni maalumu ya nyumba hadi nyumba kwa lengo la kuwasaka wanafunzi wa shule za msingi na sekondari, ambao waliacha masomo na kukimbilia visiwani kufanya shughuli za uvuvi ,vibarua majumbani na waliobebeshwa ujauzito na kufichwa na wazazi wao.
Operesheni hiyo maalumu inaongozwa na mkuu wa wilaya ya Muleba mhandisi Richard Ruyango, imewanasa jumla ya wanafunzi 9 wa kidato cha kwanza na cha pili wa shule ya sekondari ya Kibanga, ambapo baadhi ya wanafunzi waliokamatwa wameelezea kuwa wanalazimika kuacha masomo kutokana na kuwa na uwezo mdogo madarasani.
Mhandisi Ruyango ametoa onyo kali kwa watendaji wa serikali za vitongoji pamoja na wakuu wa shule wanaoshirikiana na watu wanaowapachika mimba wanafunzi na kuahidi kuwachukulia hatua kali wale wote watakaokamatwa kwa kuhusika na vitendo hivyo.
